እዞም ካብ ሃገረ ኬንያ፡ ደቡብ ሱዳን፡ ብሩንዲ፡ ዛምብያ ዝተወከሉ መራሕቲ፡ ነቲ ሕዞምዎ ዝጸንሑ ኣብ ሓፈሻዊ ምምኅዳራዊ ዕዮታት እዚ ማኅበርን ናይዚ ዓመት ውጥናዊ መደባትን ሸቶትታትን ምስኡ ዝተሓሓዙ ፋይናንሳውን ባጀታውን ጸብጻብን ምቕርሐን ዝምልከት ጉባኤን፡ ርክብ ምስ መራሕቲ ሃይማኖት ኤርትራ ብፍላይ ድማ ምስ ኣባላት ናይዚ ማኅበር ዝኾና ቅድስት ኦርቶዶክስ ተዋሕዶ ቤተ ክርስቲያናን ወንጌላዊት ሉተራዊት ቤተ ክርስቲያንን ብሕጉስ መንፈስ ዛዚሞም።

ኣብ ዝቐጸሉ መዓልታት ድማ እዞም ላዕለዋይ ምምኅዳራዊ መሪሕነት ፈጻሚት ኮሚቴ ቤት ምኽሪ ማኅበር ኣብያተ ክርስቲያን ዓበይቲ ቀላያትን ቀርኒ ኣፍሪቃን፡ ኣብ ተወሳኺ ሕንጸት ዝርከብ መንፈሳዊ ኮሌጅ ነገረ መለኮት ደብረ ሲና፡ ርእሰ ኣድባራት ደብረ ጽዮን ቅድስት ድንግል ማርያም፡ ኣብ ሕንጸት ዝርከብ ደብረ ደናግል ቅድስት ድምያና፡ ጉባኤ ማኅበረ ምእመናን አብያተ ትምህርተ ሰንበት ደብረ ብሥራት ቅዱስ ገብርኤል ኣኽርያን ደብረ ፀሐይ አቡነ ተክለሃይማኖት ሓዝሓዝን፡ ከምኡ ድማ ኣብ ነፋሲትን ወደባዊት ከተማ ባጽዕን ዑደት ድኅሪ ምክያዶም፡ በቲ ኣብ ኤርትራ ዘኅለፍዎ ቅንያትን ብዓይኖም ዝተዓዘብዎ ሰላምን ኣድናቖቶም ብምግላጽ ብሰላም ተፋንዮም።

እዚ ማኅበር እዚ ስሙ ብልክዕ ከም ዘነጽሮ ኣብ ቀርኒ ኣፍሪቃን ዓበይቲ ቀላያትን ዝርከባ ሃገራት ጥራይ ዘጠቓልል ዞባዊ ማኅበር ኮይኑ፡ ብተመሳሳሊ ንዅለን እዘን ሃገራት ሓዊሱ ድማ ንምልኣት ሃገራት ኣፍሪቃ ዝሓቍፍ ማኅበር ኣብያተ ክርስቲያናት ኣፍሪቃ (All African Council of Churches, AACC) ድማ ብደረጃ ኣህጕር ኣፍሪቃ ዝተመዝገበ ማኅበር፡ ንኦርቶዶክስ ተዋሕዶ ቤተ ክርስቲያን ኤርትራ ሓዊሱ፡ ናይ ግብጽን ኢትዮጵያን ኦርቶዶክስ ኣብያተ ክርስቲያናት ብደረጃ ኣባልነት ዝነጥፋሉ ማኅበር ምህላዉ ይፍለጥ።

ቅድስት ቤተ ክርስቲያና ብመሪሕነት ሓላፊ ወጻኢ ዝምድናታትን ፕሮትኮላዊ ጉዳያት ቅዱስ ሲኖዶስን ቀሲስ በረኸት ኪዳነ ንዝመጽእ ክልተ ዓመታት ኣባል ፈጻሚት ኮሚቴ እዚ ማኅበር ኮይና ከተገልግል ብምልኣት ከም ዝተመርጸት ይፍለጥ፡ ብተወሳኺ እዚ ጉባኤ  ፈጻሚት ኮሚቴ ንፈለማ እዋን ኣብ ኤርትራ ኣብ 2013.ፈ ዝተቓንዐ ኮይኑ፡ እንሆ ድማ ድኅሪ 12 ዓመት ኣብ ሃገርና ኤርትራ ንኻልኣይ ግዜኡ ብምክያዱ ፍሉይ ይገብሮ።